Бүгүн Талас шаардык кеңешинин IX чакырылыштагы кезектеги XIII сессиясы болуп өттү. Жыйында шаардын социалдык-экономикалык абалына тиешелүү бир катар маанилүү маселелер каралып, тарыхый чечимдер кабыл алынды.
Сессияга шаар мэри Нургазы Асылбеков, мэрдин орун басары Айбек Көчөрбаев, шаардык кеңештин төрагасы Калыс Джаныбеков жана депутаттар менен бирге мекеме-ишканалардын жетекчилери катышты.
Электроавтобустар: Коомдук транспорттогу жаңы доор
Жыйындын эң негизги жаңылыгы — буга чейин талкуу жаратып, кийинкиге калтырылып келген 30 даана жаңы электр автобустарын лизинг аркылуу алып келүү маселеси болду. Депутаттар бул долбоордун шаардыктар үчүн маанилүүлүгүн эске алып, бир добуштан колдоп беришти.
Бул кадам Талас шаарындагы коомдук транспорт көйгөйүн чечүүгө жана экологиялык абалды жакшыртууга багытталган ири долбоор болуп калмакчы.
Күн тартибиндеги башка маселелер
Сессиянын алкагында жалпысынан 13 маселе каралды. Алардын ичинде шаардык чарбаны өнүктүрүү, бюджеттик маселелер жана калкка көрсөтүлүүчү кызматтардын сапатын жогорулатуу сыяктуу багыттар камтылган. Талкуунун жыйынтыгында, депутаттар бардык маселелер боюнча бирдиктүү позициясын билдирип, чечимдер бир добуштан кабыл алынды.
Жыйындын соңунда мэр Нургазы Асылбеков шаардык кеңештин депутаттарына конструктивдүү кызматташтык жана шаардын келечеги үчүн кабыл алынган маанилүү чечимдер үчүн ыраазычылык билдирди.
